Tinib-tinchimas Chusovitina tug'ilgan kunida ham musobaqada qatnashmoqda

Janubiy Koreyaning Cheju shahrida badiiy va sport gimnastikasi bo'yicha Korea Cup musobaqasi bo'lib o'tmoqda.

Bugun ushbu turnir doirasida hamyurtimiz Oksana Chusovitina o'z ishtirokini boshlaydi. Sportchimiz musobaqada o'zining sevimli tayanib sakrash mashqi bo'yicha g'oliblik uchun kurash olib boradi.

E'tiborlisi, bugun Oksana Chusovitina o'z tavallud ayyomini nishonlamoqda. Uning musobaqadagi g'olibligi esa Oksana uchun unutilmas kunlardan biri bo'lib qoladi. Sportchimiz bugun 44 yoshni qarshi olmoqda.

Fursatdan foydalanib, O'zbekiston Milliy olimpiya qo'mitasi Oksana Chusovitinaning bugungi tavallud ayyomi bilan muborakbod etadi va bo'lajak musobaqada omad tilab qoladi.