Fajr Ibrohim: «Hozirda Suriya terma jamoasi o'tish davrini boshdan kechirmoqda»

Xabaringiz bor, ertaga O'zbekiston milliy terma jamoasi Suriyaga qarshi bahs olib boradi. Mazkur o'yin oldidan tashkil etilgan matbuot anjumanida Suriya terma jamoasi bosh murabbiyi Fajr Ibrohim qatnashdi.

"Suriya terma jamoasi hozirda o'tish davrini boshdan kechirmoqda. Biz tarkibda bir qator o'zgarishlarni amalga oshirdik. Milliy terma jamoaga olimpiya terma jamoasidan bir qator yoshlarni jalb qildik. Asosiy maqsadimiz bo'lajak Jahon chempionati saralashida muvaffaqiyatli ishtirok etish.
 
O'zbekiston terma jamoasi Osiyoning kuchli terma jamoalaridan biri. Biz O'zbekiston ishtirokidagi so'nggi ikkita uchrashuvni tomosha qildik. Terma jamoangizda kuchli hujum chizig'i mavjud. Himoyada ham o'zbekistonliklar yaxshi o'yin namoyish qilishmoqda. Shuningdek, futbolchilarning jismoniy holati ham yaxshi darajada ekanini alohida ta'kidlab o'tgan bo'lardim.
 
Shunga qaramay, biz ertaga chiroyli va mazmunli o'yin namoyish qilishga harakat qilamiz", — dedi Fajr Ibrohim.