O'zbekiston darvozasiga gol urgan suriyalik futbolchi zilzilada vafot etdi

Suriya futbol federatsiyasi zilzilalar ostida sobiq futbolchi Nodir Jahodarning ham jasadi topilganini ma'lum qildi.

Kattaroq yoshli futbol muxlislariga bu nom tanish bo'lishi kerak. Milliy jamoamiz uchun ilk Osiyo Kubogi 1996 yilda BAAda bo'lgan va Yaponiya, Xitoy, hamda Suriya bilan bir guruhda qatnashgandik.

Xitoyni yutib (2:0), Yaponiyaga yutqazgach (0:4), guruhdan chiqish uchun Suriya bilan durang kifoya qilardi. Ammo o'yinni 1:2 hisobida yutqazganmiz. Suriya tarkibida o'sha paytda 19 yoshda bo'lgan Nodir Jahodar hisobni ochgandi. Avvalroq, Yaponiya darvozasini ham ishg'ol qilgan Nodir Suriya futboli kelajagi deb baholangandi. Keyinchalik u terma jamoasi tarkibida u qadar ko'p maydonga tushmagan.

Nodir Jaxodarni, umuman, mana shu ofatlarda vafot etgan barchani Alloh rahmatiga olsin.

Qahramon Aslanov.