Ronalduga qo'yilayotgan zo'rlash ishi yopildi

«Yuventus» hujumchisi Krishtianu Ronalduga nisbatan qo'yilgan Ketrin Mayorgani zo'rlagani bilan bog'liq ish yopildi. Bundan bir oy oldin Las-Vegas sudiga mazkur ishni yopish borasida ariza kelib tushgan.

Bu ish tomonlarning o'zaro roziligi asosida qilinganmi yoki ayolning tashabbusi bilan amalga oshirilganmi — hozircha bu haqda aniq ma'lumot yo'q.

2018 yilning oktyabr oyida AQShlik ayol Ketrin Mayorga bayonot berib, 2009 yilda Las-Vegasdagi mehmonxonada Krishtianu Ronaldu o'zini zo'rlagani haqida ma'lumot tarqatdi. Shu bilan birgalikda, ayolning aytishicha, Ketrin bu masalada sudga murojaat qilmasligi uchun portugaliyalik futbolchi o'sha paytda unga 375 ming dollar pul belgan.

Ronaldu bu ayblovlarning barchasini inkor qildi. Shunga qaramay, ko'pgina tashkilotlar futbolchi bilan homiylik shartnomalarini bekor qilishdi. Jumladan, EA Sports kompaniyasi FIFA 19 simulyatorida Ronalduning qiyofasidan foydalanmadi.