Boks. Bokudagi musobaqa muvaffaqiyatli boshlandi: 5 ta jangning barchasida muddatidan oldin g'alaba

Xabar berib o'tganimizdek, Ozarbayjon poytaxti Boku shahrida boks bo'yicha 2005-2006 yillarda tug'ilgan bokschilar o'rtasida "Geydar Alievning 96 yilligi" nomli musobaqa bo'lib o'tmoqda.

Bahslarda Ozarbayjon, Qozog'iston, Gruziya va O'zbekistondan tashrif buyurgan yosh charm qo'lqop ustalari ishtirok etishmoqda. Bugun musobaqada dastlabki kun janglari bo'lib o'tdi. Unda besh nafar hamyurtimiz ringga ko'tarildi. Quvonarlisi, bugun jang qilgan bokschilarimizning barchasi muddatidan oldin g'alaba qozondi.

Kun davomida Humoyunmirzo Abdurasulov (35,5 kg), Jamoliddin Holiqov (41,5 kg), Boburbek Bobojonov (-46 kg), Dalerjon Bozorov (-52 kg) hamda Jahongir Narziev (-56 kg) kabi bokschilarimiz mezbon sportchilarga qarshi jang qilishdi va muddatidan oldin g'alaba qozonishdi.

Ertaga Toshkent vaqti bilan soat 16:00dan so'ng yana besh nafar bokschimiz jang qilishi ko'zda tutilgan.

O'zbekiston boks federatsiyasi matbuot xizmati