Pyatov va Ronaldu teng…yoki eng mashhur va ko'p bolali futbolchilar

Ukraina milliy jamoasi va Donetskning «Shaxtyor» klubi darvozaboni joriy yil boshida bitta ko'rsatkich bo'yicha o'zini birinchi raqamli yulduz sifatida ko'radigan Krishtianu Ronaldu bilan tenglashdi.

Qiziq, golkiper qanaqasiga to'purar hujumchiga tenglashishi mumkin? Gap shundaki, Pyatov oilasida to'rtinchi farzand tug'ildi. Ko'pchilik biladi, portugaliyalik futbolchi ham 4 nafar aka-uka (opa-singil) otasidir. Xo'sh, zamonaviy futbolning yana qaysi yulduzlari «Ko'p bolali ota» qabilidagi faxrli maqomga egalar?

2019 yil Andrey Pyatov uchun juda omadli keldi - u 15 fevral kuni nihoyat, o'g'ilchali bo'ldi. Bunga qadar «Shaxtyor» golkiperi turmush o'rtog'i Yuliya bilan 3 nafar qizaloqni tarbiyalayotgandi. Deylik, to'ng'ich qizi Darya 13 yoshda, o'rtanchasi Milana 9 yoshda va kichigi Mayya 4 yoshda. Xullas, oilaparvar darvozabon axiyri, niyatiga etdi.

Turinning «Yuventus» klubi bilan Italiya «A» seriyasida ham zafar quchgan Portugaliya milliy jamoasi yulduzi Krishtianu Ronalduning to'ng'ich farzandi 2010 yil 17 iyun kuni tug'ildi. Surogat ona dunyoga keltirgan chaqaloqqa otasining ismini berishdi - kichik Krishtianu. 2017 yilga kelib esa, mashhur futbolchining oilasi birdaniga 3 nafar farzand hisobiga kengaydi: 5 iyun kuni egizaklar - Eva va Metyu tug'ilishdi (yana surogat onadan). 12 noyabr sanasi esa Ronalduning hozirgi qallig'i Jorjina Rodriges uni qizaloq (ismi - Alana) bilan siyladi.

Krishtianuning birinchi raqamli raqobatchisi Lionel Messi hozircha biroz orqada. «Barselona»ning almashtirib bo'lmas etakchisi turmush o'rtog'i Antonella bilan 3 nafar farzandni ulg'aytirmoqda. Aytgancha, Argentina terma jamoasi vakilida qizi yo'q, faqat o'g'il bolalar - Tyago (tug'ilgan sanasi - 2012 yil 2 noyabr), Mateo (tug'ilgan sanasi - 2015 yil 11 sentyabr) va Chiro (tug'ilgan sanasi - 2018 yil 10 mart).

«Real Madrid» sardori Serxio Ramos mahbubasi - taniqli teleboshlovchi Pilar Rubioni eru ko'kka ishonmaydi. Diqqatni tortadigan tomoni, Ispaniya milliy jamoasi vakili farzandlari soni bo'yicha Messi bilan nafaqat teng, balki o'xshash. Ya'ni Serxio Ramos ham 3 nafar o'g'ilcha otasidir. Rubio 4 yoshda bo'lsa, Marko 3 yoshda. Kenjasi Alexandro esa 25 mart kuni 1 yoshga to'ldi.

3 nafar o'g'li bor futbolchilardan yana biri - bu «Shaxtyor» klubi va Ukraina terma jamoasi yarim himoyachisi Taras Stepanenko. Ukrainalik futbolchi oilasida Yaroslav (5 yosh) va Svyatoslav (4 yosh) 2 yil oralig'ida tug'ilishgan, Miron esa shu oy 2 yoshga to'ladi.

«Di Si Yunayted» hujumchi Ueyn Runi o'g'il farzandlar soni bo'yicha Messi va Ramosdan ham oldinda. Angliyalik faxriy futbolchi oilasida naq 4 nafar polvontoy ulg'aymoqda: Kay Ueyn (9 yosh), Kley Entoni (5 yosh), Kit Jozef (3 yosh) va Kass Mak (1 yosh).

Ispaniyalik faxriy golkiper Pepe Reyna chindan ham, katta oila boshlig'i. «Milan» darvozaboni 5 nafar farzandning mehribon otasi. U avvalo, Gretsiya (12 yosh), Alma (10 yosh), Luka (7 yosh), Tyago (5 yosh) va Sira (4 yosh) uchun maydonga tushishini tez-tez ta'kidlaydi.

Bu yil kutilmaganda, «Monako» safiga qo'shilgan ispaniyalik Sesk Fabregas hozirgi qallig'i Daniella Semaan bilan 2012 yili tanishgan. Ortda qolgan 7 yil oralig'ida juftlik 3 nafar farzandli bo'ldi: Liya (tug'ilgan sanasi - 2013 yil 10 aprel), Kapri (tug'ilgan sanasi - 2015 yil 10 iyul) va Leonardo (tug'ilgan sanasi - 2017 yil 4 aprel). Darvoqe, Semaan xonimning yana ikki farzandi bor - 18 yoshli Mariya va 13 yoshli Jozef uning oldingi nikohidan tug'ilishgan.

«Real»ni bezor qilgan Uels «shahzodasi» Garet Beyl oilasida 2018 yil may oyida o'g'il farzand - Aksel Charlz dunyoga keldi. Yarim himoyachida yana 2 nafar qizalog'i bor - 6 yoshli Alba Vayolet va 3 yoshli Nava Valentina.

Frantsiyalik yarim himoyachi Frank Riberi oilasida o'ziga xos balans yuzaga kelgan. Ya'ni «Bavariya»ga ko'p xizmat qilgan futbolchida 2 nafardan qizi (13 yoshli Hiziya va 11 yoshli Shohinoz) hamda o'g'li (7 yoshli Saif al Islom va 3 yoshli Muhammad) bor.

«Oltin to'p»-2018 sohibi Luka Modrich 3 nafar farzandning baxtiyor otasi. «Real»ning xorvatiyalik yarim himoyachisi hamxonasi Vaney Modrich bilan bir o'g'il (Ivano 9 yoshda) va ikki qiz (Emu 6 yoshda va Sofiya 2 yoshda)ni tarbiyalamoqda.

«Stok Siti» klubi va Burundi terma jamoasi hujumchisi Seydo Beraxino atigi 1,5 oy ichida birdaniga ko'p bolali otalar qatoriga qo'shildi. Aniqrog'i, u 2018 yilning 30 may - 17 iyul kunlari oralig'ida 3 karra ota bo'ldi. Yanada aniqrog'i, 3 nafar ayoldan farzand ko'rdi. Seydoning sobiq turmush o'rtog'i Stefaniya Kristofor o'g'ilcha (Kosta) dunyoga keltirgan bo'lsa, keyingi xushtori Chelsi qizcha (Aniya Mariya) bilan siyladi. Beraxinoning Burundidagi mahbubasi ham ayni shu davrda ona bo'ldi...