Samvel Babayan: «Murabbiylikka qaytish? Yo'q, «pauza» bosdim»

Bugun, 22 may kuni turli ijtimoiy tarmoqlar orqali taniqli mutaxassis, o'z vaqtida “Paxtakor” va O'zbekiston milliy terma jamoalarini boshqargan Samvel Babayan Toshkentning “Lokomotiv” klubiga bosh murabbiy etib tayinlanishi haqida xabarlar tarqaldi.

Bunday xabarlarning tarqalishiga sabab, so'nggi vaqtlarda temiryo'lchilarning na ichki, na xalqaro maydonda ishlari yurishyapti. Bu esa tabiiyki jamoa muxlislari va klub rahbariyatini qoniqtirmayapti.

Biroq, “Lokomotiv” klubi rasmiylari hamda Samvel Babayanning shaxsan o'zi Worldnews.uz axborot agentligiga ma'lum qilishicha, ushbu xabarlar hali tasdiq topmagan. Babayan bu borada o'zida istak borligini lekin hozircha murabbiylikga qaytishga tayyor emasligini aytdi.

“Hozircha men qandaydir lavozimga ko'tarilmadim. Chunki o'zim bunga qarshilik bildirdim. Zamonaviy tilda aytganda “pauza” berdim.

Murabbiy bo'lishni istayman, ammo har narsaning o'z vaqti keladi. Shunday ekan men hozircha “Lokomotiv”da murabbiy emasman. Bunday norasmiy xabarlarga ishonmasliklarini so'ragan bo'lar edim”, deydi Babayan.

“Lokomotiv” klubi rasmiylarining ta'kidlashicha, murabbiy Andrey Fyodorov iste'foga chiqarilmagan. Temiryo'lchilarni O'zbekiston Superligasi 10-tur uchrashuvlari doirasidagi “Nasaf”ga qarshi safar o'yiniga aynan Fyodorov boshqarib boradi. Mazkur o'yinda qayd etilajak natija ko'p jihatdan Fyodorovning kelgusi taqdiriga oydinlik kiritib beradi.

Shunday ekan, Samvel Babayan bugun bo'lmasa keyinroq “Lokomotiv” bosh murabbiyiga aylanib qolishi ehtimoldan xoli emas.

Ma'lumot o'rnida, Andrey Fyodorov 2018 yilning aprel oyida Andrey Miklyaev o'rniga “Lokomotiv” bosh murabbiyi etib tayinlangan edi.