Andrey Fyodorov: «Bu o'rtoqlik o'yini emas!»

“Lokomotiv” – “Al Rayyan” uchrashuvi yakunlanganidan keyingi matbuot anjumanida “temiryulchilar” bosh murabbiyi Andrey Fyodorov hamda uchrashuvning eng yaxshi futbolchisi Timurxo'ja Abduxoliqov ishtirok etdi.

– Birinchi navbatda “Lokomotiv”ning barcha muxlislarini g'alaba bilan tabriklayman. Hozirgi holatda bu o'yin bizga hech nima bermasdi, buni kecha ham ta'kidlagandim. Oz bo'lsada muxlislar kelganiga rahmat. Kecha menga bu o'yin deyarli o'rtoqlik maqomida o'tishini va qanday qilib futbolchilarga ishtiyoq berishimni aytishgandi.

Bu o'rtoqlik o'yini emas! OChL o'yinlari ko'p bo'lmaydi. Ha, o'yin juda yomon boshlandi. Ma'murning bu xatosini uning o'yin amaliyoti kamligi bilan bog'lagan bo'lardim. Asosiysi, taslim bo'lmadik va asabiylashmaslikka intildik. Tanaffusda futbolchilarga xotirjam bo'lish kerakligini aytdim. Ikkinchi bo'lim boshidan, balki butun bir taym davomida o'yinni nazorat qildik va hujumlarni ajoyib yakunlay oldik. Bu esa g'alabaga olib keldi. Yigitlarning g'alabaga chanqoqligi yuqori edi.

Ha, bunga qadar ko'plab xatolarga yul qo'ydik. G'alaba 3 ochkodan boshqa hech nima bermasligini barcha bilsa ham, futbolchilarga g'alaba qozonish shart ekanligini va o'zimizni yuqotib qo'ymasligimizni, Har doimgidek o'ynash kerakligini tushuntirdim. Ayta olamanki, bugun kamroq xato qildik.

Timurxo'ja Abduxoliqov: – To'g'ri, g'alaba hech nimani hal qilmasdi. Ammo g'alaba har doim yaxshi hissiyotlar beradi. O'yinga keladigan bo'lsam, 2:0dan keyin uyg'ondik, qaytishga harakat qildik. Unga qadar biz kontsentratsini yuqotib qo'ydik. Albatta, keyinchalik o'zimizga kelib, ketma ket gollar urdik.

– OChLning ushbu mavsumida 5ta gol urdingiz. Xo'sh, xalqaro maydondagi o'yiningizdan qoniqdingizmi?

5ta gol urasizmi, 10ta urasizmi buning farqi yuq. Guruhdan chiqish kerak edi. 2016 yilda 3ta gol urgan bo'lsak ham, guruhdan chiqqandik. Bu mavsum esa vazifa bajarilmadi.