Jeymi Karrager: "Angliya Jahon chempioni bo'ladi. Faqat tarkibda u bo'lishi kerak"

Terma jamoaning sobiq himoyachisi Angliyaning Jahon chempionatidagi imkoniyatlarini yuqori baholadi. U Garet Sautgeytdan Xarri Keynni hech kimga almashtirmaslikni so'radi. Faqat shu orqali inglizlar mundialni yutishi mumkin. Xarri Keyn esa terma jamoada gol urish borasida Ueyn Runiga juda ham yaqin qolgan. "Tottenxem" hujumchisi bu borada 50 ta golga ega. U bu orqali afsonaviy Bobbi Charltonga etib oldi. Runidan esa atigi 3 ta to'p orqada xolos. Yana bir tomoni – Keyn 50 ta golga bor-yo'g'i 73 ta bahsda erishgan. Xarri Keyn haqida Karrager shunday deydi:

"Xarri Keyn oldida juda katta ma'suliyatli vazifa turibdi. Unga butun millat g'ururi ishonib topshiriladi. Men uni almashtirib bo'lmas a'zo deb hisoblayman. Keyn jahon darajasidagi futbolchi. Ha, oxirgi musobaqalarda u unchalik ham ko'rinmay qoldi. Ammo u qaytadi. Qaytishi ham kerak. Keyn yaxshi formada bo'lsa, bu narsa Jahon chempionatida Angliyaga katta imkoniyat taqdim etadi".
Karragerdan Angliyaning mundialdagi imkoniyatlari haqida so'ralganida u shunday deydi:

"Ha, oson bo'lmaydi. O'ta murakkab davr arafasida turibmiz. Jahon chempionatida to'rt-beshta da'vogarlar borki, o'z darajasidagi istalgan jamoani mag'lub eta oladi. Shuni ham yodda tutishimiz kerakki, Jahon chempionati – bu kubok musobaqasi. Shu sabab, guruhdagi bahslarga ham finaldek yondoshmoq lozim. Undan avval tarkib futbolchilarini to'g'ri tanlash va ularni saralab olish kerak. Qolaversa, o'yinchilar ham jarohatlardan ehtiyot bo'lishlari shart. Bitta bahsda atigi bitta kerakli futbolchidan foydalana olmaslik, yomon oqibatlarga olib kelishi mumkin. Shunga qaramay, men Angliyani Qatarda o'zini ko'rsata oladi deb o'ylayman. Shunga umid bog'laganman".

Yaqindagina Xarri Keynga o'rinbosar sifatida "Brentford" futbolchisi Ayvan Touni ham terma jamoaga jalb etildi. Sautgeyt uchun Italiya va Germaniyaga qarshi bahs o'ta muhim. Shundan keyin u Qatarga borish uchun kimlar loyiq ekanini bilib oladi. Keyn esa, shubhasiz, jamoani etakchilari safida bo'ladi.

ISMATOV J.