O'q otish sport turi bo'yicha yoshlar mahorati sinovdan o'tkazildi

Toshkent shahar “Vatanparvar” tashkiloti hududlarda sportning texnik va amaliy turlarini ommalashtirish, yoshlarda harbiy vatanparvarlik ruhini yanada rivojlantirishga qaratilgan yangi loyiha va sport musobaqalarini o'tkazib kelmoqda.   O'zbekiston Respublikasi Prezidentining 2018 yil 12 dekabrdagi “Yoshlarni vatanparvarlik ruhida va jismoniy tarbiyalash hamda chaqiriluvchilarni harbiy-texnik mutaxassisliklar bo'yicha tayyorlash tartibini takomillashtirish bo'yicha qo'shimcha chora-tadbirlar to'g'risida”gi qarori ijrosini ta'minlash borasida tizimli ishlar qilinmoqda. Tashkilotning hududiy kengashlari yil davomida “Biz vatanparvarlarmiz” shiori bilan sport musobaqalarini tizimli ravishda tashkil qilib, turli ko'rgazmali tadbirlarda yoshlar faolligini oshirishga alohida e'tibor qaratmoqda.   Jumladan, Toshkent shahar “Vatanparvar” tashkilotining Mirobod o'quv sport texnika klubi tashabbusi bilan Respublika texnika va amaliy sport turlari markazida o'q otish bo'yicha Toshkent shaxar ochiq birinchiligi o'tkazildi.     Musobaqada “Vatanparvar” tashkilotining Toshkent shahridagi barcha tumanlari va boshqa sport klublaridan 9 jamoa o'zaro bellashdi.   – Bellashuvlarda jamoamiz yuqori natija qayd etganidan xursandman, – deydi “Respublika texnik va amaliy sport turlari markazi” klubi a'zosi Sunnatillo Ahmedov. – Yangi do'stlar orttirdik. Muhimi mashg'ulotlarda o'rgangan bilimlarimizni sinovdan o'tkazik. Ushbu sport turi insonga diqqatni jamlash, sabrli bo'lishni o'rgatadi. Shug'ullanayotganimga ko'p bo'lmagan bo'lsa ham ustozlarim erishayotgan natijalarimdan xursand.   Musobaqa yakuniga ko'ra, 1-o'rinni “Respublika texnik va amaliy sport turlari markazi” jamoasi egalladi. 2-o'rinni Mirobod, 3-o'rinni esa Uchtepa jamoasi yoshlari qo'lga kiritdi.