«Biz sog'lom turmush tarafdorimiz» – «Sport oyligi» ana shu shiorda o'tkaziladi

O'zbekiston Milliy olimpiya qo'mitasi tashabbusi bilan may oyi respublikamizda “Sport oyligi” deb e'lon qilindi.   Kecha MOQ tomonidan qo'l urilgan ushbu yangi loyihaga start berildi. Unda ilgari surilgan “Biz sog'lom turmush tarafdorimiz” jumlasi yuzlab yosh sportchilarning qalbidagi shiorga aylandi. Ushbu shior bilan boshlangan yangi fleshmob sekin-asta mamlakatimizni qamrab olmoqda.   “Sport oyligi”ni e'lon qilish, avvalo, ommaviy sport bilan shug'ullanuvchi qatlamni oshirish va har bir fuqaroni sog'lom turmush tazriga jalb qilishdir. MOQ Bosh kotibi Jasur Matchanov ham bu jihatga alohida e'tibor qaratdi.   “Biz joriy qilgan oylik murakkab sport turlarini qamrab olmagan. Unda asosan basketbol, futbol, voleybol, gandbol kabi o'yin sport turlarini uchratish mumkin. Maktabgacha ta'lim muassasalari, maktab va oliy o'quv yurti vakillari uchun alohida dastur ishlab chiqilgan. Misol uchun, maktabgacha ta'lim va kichik yoshdagi o'quvchilar uchun “Quvnoq startlar” sport o'yinini joriy qilganmiz. Umuman sport dasturlari bo'yicha nizom ishlab chiqqanmiz va bu bilan kerakli federatsiyalar va ta'lim muassasalari tanishib chiqqan”, – dedi Jasur Matchanov.     Tabiiyki, bunday yirik sport tadbiri sport yulduzlarini ham befarq qoldirmadi.   “Bolada yoshligidan sportga bo'lgan qiziqishi uyg'onadi, unga mehr beradi. Ota-onasi ham bundan xursand bo'lib, farzandini shu sportga beradi. O'zbek xalqi to'y-marosimlarida kurash qiladi. Shu kabi tadbirlarda juda ham ko'p iqtidorlarni ko'rish mumkin. Biz ham shu to'y kurashlarida ishtirok etib, katta sportga keldik, jahon ko'rdik, dunyo birinchiligi va Olimpiya o'yinlarida ishtirok etdik. O'ylaymmanki, bunday ommaviy sport tadbirlarining tashkil qilinishi yangi nomlarni kashf qilishda katta yordam beradi”, – deydi dzyudo bo'yicha Pekin Olimpiadasi sovrindori Abdullo Tangriev.     Sport oyligi 31 mayga qadar davom etadi. Unda yurtimizning barcha tuman va shaharlari bo'yicha ko'plab ommaviy musobaqalarni tashkil qilish rejalashtirilgan bo'lib, yakunda Respublika bosqichi bo'yicha g'olib va sovrindorlar aniqlanadi.