"Manchester Yunayted" oxirgi marta Antonini "Ayaks"dan sotib olishga harakat qiladi. Ten Xag uning Premer-liga yulduziga aylanishiga ishonmoqda

"Manchester Yunayted" hamon "Ayaks" vingeri Antoniga qiziqish bildirmoqda.

Goal.com xabariga ko'ra, ingliz klubi 22 yoshli futbolchini qo'lga kiritish uchun so'nggi bor urinib ko'radi.

"Ayaks" braziliyalikni qo'yib yubormoqchi emas va Niderlandiya klubining moliyaviy talablari "MYu"ni hafsalasi pir bo'ldi. Avvalroq mankunianliklar Antoni uchun 60 million evro taklif qilgandi, ammo bu summa “Ayaks” olishni istayotganidan ancha yiroq. Bu yozda vinger uchun 80 million evro to'lov olinsagina u qo'yib yuboriladi.

"Manchester Yunayted" "Ayaks"ning talablarini qondirishga tayyor emas, lekin avvalgi taklifni yaxshilash niyatida.

Qayd etilishicha, vinger 15 million evrodan ko'proqqa transfer qilingan taqdirda Antonining sobiq jamoasi “San-Paulu” shartnomadan anchagina mablag' oladi.

Erik ten Xag o'zi "Ayaks"da birga ishlagan futbolchisini "Manchester Yunayted"ga o'tishini istamoqda. Menejer qanot hujumchisi Premer-liga yulduziga aylanishi mumkin, deb hisoblaydi va braziliyalikni bunday katta summaga sotib olish uchun tavakkal qilish kerak, deb hisoblaydi.

"Ayaks"da Antonini bu yozda sotishga na xohish va na ehtiyoj bor. Oldinroq klub Lisandro Martinesni “Manchester Yunayted”ga, Sebastyan Allerni Dortmundning “Borussiya”siga va Rayan Gravenberxni “Bavariya”ga katta mablag'ga sotib yuborgandi.

Braziliyalik futbolchi o'tgan mavsumda “Ayaks” safida barcha turnirlar doirasida 33 ta o'yinda maydonga tushib, 12 ta gol urdi va 10 ta golli uzatmani amalga oshirdi.