Og'ir atletika: bugungi bellashuvlarda hozircha 3ta medal qo'lga kiritildi

Xabaringiz bor, poytaxtimiz Toshkent shahri og'ir atletika bo'yicha o'smirlar va yoshlar o'rtasidagi Osiyo chempionatiga mezbonlik qilmoqda.

Hozirgina qizlar o'rtasida -71 kg vazn toifasida A guruhi bahslari yakunlandi. Unda terma jamoamiz a'zolaridan Dilnoza Fayzullaeva va Gulshodaxon Dadamirzaevalar ishtirok etishdi.

Dast ko'tarish mashqida Dilnoza Fayzullaeva o'zining barcha urinishlaridan unumli foydalandi (76, 80, 82) va natijada kumush medalga ega chiqdi.

Siltab ko'tarish mashqida esa Gulshodaxon Dadamirzaevaga omad kulib boqdi, u 97 kg vaznni o'ziga bo'ysundirib, kumush medalni qo'lga kiritdi. Fayzullaeva siltab ko'tarish mashqida sovrinli o'rinlardan quruq qoldi.

Shunga qaramay ikkikurash natijasiga ko'ra Dilnoza Fayzullaeva bronza medali sohibasiga aylandi.

Natijada Dilnoza Fayzullaeva 1ta kumush va 1ta bronza hamda Gulshodaxon Dadamirzaeva 1ta kumush medalni mamlakatimiz sport delegatsiyasi hisobiga qo'shib qo'yishdi.

Ma'lumot uchun: og'ir atletika bo'yicha o'smirlar va yoshlar o'rtasidagi Osiyo chempionati 25 iyulga qadar davom etadi.