Engil atletika. Safina Sa'dullaeva JChda 5-o'rinni egalladi

Amerika qo'ma shtatlarining Oregon shtati Yujin shahrida engil atletika bo'yicha jahon chempionati bo'lib o'tmoqda. Bugun balandlikka sakrash sektorida ayollar final bahslarida ishtirok etishdi.

O'zbekistonlik atlet Safina Sa'dullaeva 12 nafar finalchi qatorida o'z omadini sinab ko'rdi. Hamyurtimiz ilk balandlik — 184 sm.ga sakrab o'tirmadi va o'z ishtirokini darhol 189 sm.dan boshladi. Safina 189, 193 va 196 sm. balandliklarni ilk urinishdayoq zabt etdi. Natijada u o'z rekordini takrorladi.

Sa'dullaeva 198 sm. balandlikning ilk urinishida to'siqdan oshib o'ta olmadi. Shundan so'ng u taktik yurish qildi. U mazkur balandlikning qolgan 2ta urinishidan foydalanmasdan, o'z urinishlarini 2 metr balandlikka qoldirdi. Afsuski, vatandoshimiz o'zining qolgan 2ta urinishida ham bu balandlikni zabt eta olmadi.

Natijada Safina Sa'dullaeva jahon chempionatida 5-o'rinni qo'lga kiritdi. Eslatib o'tamiz, o'zbekistonlik sportchi Toki-2020 olimpiadasida 6-o'rinni band etgandi.

Ushbu yo'nalishda jahon chempioni unvonini avstraliyalik Eleanor Patterson qo'lga kiritdi. Ikkinchi o'rinni esa ukrainalik Yaroslava Moguchix egalladi. Ushbu sportchilar 204 sm. balandlikdan sakrab o'ta olishmadi. Ammo 202 sm. balandlikni "yashil qit'a" vakili ilk urinishdayoq zabt etgani uchun oltin medalga ega chiqdi. Moguchix esa 202 sm.dan ikkinchi urinishda o'tgandi.

Bronza medali italiyalik Elena Vallortigaraga nasib etdi (2 metr).