Mourino Dzanoloni "Yuventus"ga o'tishiga halaqit qildi

Italiyalik yarim himoyachi Nikolo Dzanolo "Roma"ni tark etish haqidagi fikrini o'zgartirdi, deb xabar bermoqda Sport Mediaset.

Manbaning yozishicha, yarim himoyachining bunday qarorga kelishiga jamoa bosh murabbiyi Joze Mourino bilan bo'lgan suhbat ta'sir qilgan. Portugaliyalik mutaxassis to'g'ri so'z topdi va futbolchini Italiya poytaxtida qolishga ishontirdi.

So'nggi bir necha oy ichida Dzanolo Turinning "Yuventus" klubiga o'tishi mumkinligi haqida xabarlar tarqalgan edi. «Keksa sinora» futbolchi uchun 50 million evro to'lashga tayyor bo'lgani aytilgandi.

Nikolo o'tgan mavsumda A Seriyada 28 ta o'yinda maydonga tushib, 2 ta gol urdi va 2 ta golli uzatmani amalga oshirdi. Uning klub bilan shartnomasi 2024 yilning o'rtalariga qadar mo'ljallangan.