«Bunyodkor» ikki futbolchi bilan kelishuvga erishdi

Mavsumning ikkinchi qismiga tayyorgarlikni Belarus poytaxti Minsk shahrida davom ettirayotgan «Bunyodkor»ning mashg'ulotlariga ertaga ikki nafar futbolchi kelib qo'shiladi.

Bugun tajribali, muxlislarga yaxshi tanish tayanch yarim himoyachi Akbar Ismatullaev va bo'ydor himoyachi Jasur Yoqubov bilan kelishuvga erishildi. Har ikkala futbolchi ham ertaga Minsk shahriga etib boradi va mashg'ulotlarga qo'shiladi.

«Davolanishlar sababli ma'lum muddat maydonga tusha olmagan bo'lsamda, hozir hammasi joyida, jarohatimdan to'liq qutilganman. Ayni vaqtda jismoniy holatim a'lo darajada. Buni mavsumning ikkinchi qismida amalda isbotlayman. Jamoaning g'alabalariga va muvaffaqiyatiga o'zimning hissamni qo'shib, mavsumni yaxshi kayfiyatda yakunlash uchun bor kuchim bilan harakat qilaman», - deya o'z fikrlarini bildirib o'tdi Akbar Ismatullaev.

Ma'lumot o'rnida. Akbar Ismatullaev "Paxtakor" klub tarbiyalanuvchisi hisoblanadi. U 2009-2017 yillarda "sherlar" sharafini himoya qilgan. Akbar so'nggi yillarda "Metallurg" safida to'p tepib kelayotgandi.