Osiyo kubogi-2023 mezbonligi uchun 4ta davlat ariza topshirdi

Xitoy 2023 yilgi Osiyo chempionatiga mezbonlik qilishdan bosh tortganidan so'ng Osiyo futbol konfederatsiyasi yangi mezbonni aniqlash maqsadida tanlov e'lon qilgandi. Belgilangan muddat — 15 iyulga qadar 4ta mamlakatdan ariza kelib tushdi. Ular:

Avstraliya
Indoneziya
Janubiy Koreya
Qatar.

Endi ushbu mamlakatlarga hukumat doirasidagi kafolat bilan bog'liq hujjatlarni taqdim etishlari uchun 31 avgustga qadar vaqt berildi. Shundan so'ng OFK rahbariyati da'vogarlarning imkoniyatlarini baholab, mezbon mamlakat nomini 17 oktyabr kuni e'lon qiladi.

Ariza topshirgan mamlakatlar orasida Avstraliya 2015 yilda qit'a chempionatiga mezbonlik qilgan bo'lsa, 2011 yilgi Osiyo kubogi Qatarda o'tgan. Indoneziya esa 2007 yilda o'z qo'shnilari — Malayziya, Tailand va Vetnam bilan birgalikda musobaqaga mezbonlik qilgan.

Qiziq tomoni, Janubiy Koreya so'nggi marta 1960 yilda Osiyo kubogini o'zida qabul qilgan ekan.

Eslatib o'tamiz, Osiyo kubogi-2023da 24ta jamoa ishtirok etadi. O'zbekiston uchinchi saralash bosqichi orqali turnir yo'llanmasini qo'lga kiritdi.

Manba: stadion.uz