Hoqon Chalxanoglu: «Milan» bizdan ancha zaif...»

«Inter» yarim himoyachisi Hoqon Chalxanoglu Turkiyaning Gazete Damga nashriga bergan intervyusida sobiq klubi - «Milan»ga biroz «tegindi».

Mana, uning yakunlangan mavsum haqidagi umumiy xulosalari: «Juda qiyin davr, chunki to'xtovsiz o'ynadik: ChL, «A» seriya, milliy jamoa... Chempionat yakunida oxirgi 4ta o'yinning barchasida g'alaba qozondik, bu ko'p narsadan dalolat. Endi Antaliyada Merix Demiral bilan miriqib hordiq chiqaramiz».

- Hoqon, tanqidga qanday qaraysiz?

- Vaqti-vaqti bilan qattiq tanqidga uchrayman, lekin hammasini ichimda saqlayman. Har holda, zimmamda katta mas'uliyat bor. Muhimi, meni yaxshi taniganlar qanday kunlarni boshimdan kechirganimni bilishadi. Umuman, tan­qid - normal holat. Salbiy qarashlar ichida yashashga majburmiz. Shuning barobarida pozitsiyamni ham, qanday o'ynashim kerakligini ham tushunaman. Shunday ekan, barcha tanqidlarga quloq solib o'tirmayman. To'g'ri, boshqalar fikrini inobatga olaman, lekin, hissiyotchan yigit bo'lsamda, reaktsiya ko'rsatmayman aslo. 

- «Milan»dan «Inter»ga o'tishda rosa qiynalgandirsiz...

- Ha, albatta. Bitta shahar, lekin boshqa-boshqa rang... «Inter»ga moslashishim ham oson bo'lmadi. Muhimi, qattiq ishladim, bor diqqatimni bir joyga jamladim. Ha, yangi jamoam emas, eskisi chempionlikka erishdi. Bunda ayrimlar bosh aybdor sifatida meni ko'rsatishmoqda. Lekin shaxsiy fikrimcha, samarali uzatmalar va gollar bilan «Inter»ning kuchayishiga yaxshigina hissa qo'shdim. «Milan»da 4 yil o'ynagan bo'lsam, hattoki, chigalyozdi mash­g'ulotlari payti ham tribunadan ismim biror marta yangramagandi. «Inter»da aksincha, birinchi mavsumdayoq ismimni kuylashga odatlanishdi. «Inter» aslida «Milan»dan ancha kuchli. Eslang, derbi o'yi­nini 75-daqiqadan keyin boy berdik. Chunki murabbiy Perishich, Barella va meni almashtirdi, natijada o'yin birdan ostin-ustun bo'lib ketdi. O'sha vaqtgacha 1:0 hisobida oldinda borayotgandik, yakunda esa 1:2... Demoqchimanki, o'sha muhim o'yindagi mag'lubiyatda murabbiyning ham «hissa»si bor. Buni o'ziga ham aytdim. Keyinchalik kubok o'yinida «Milan»ni 3:0 hisobida engganimiz barchasini ko'rsatib turibdi.

- Aytishlaricha, Ibragimovich bilan chiqisholmas ekansiz. Shundaymi?

- Qarang, u 18 emas, 40 yoshda. Ibra hamisha e'tiborni jalb qilishni yaxshi ko'radi, shu bilan tirik. Bu yil jamoasi yutug'iga hissa qo'shmadi, zo'r­g'a o'ynadi. Lekin muxlislar e'tiborini tortish uchun hammasiga tayyor turadi. Aslida buning menga umuman farqi yo'q. «Milan»da o'ynaganimda, u menga ko'p qo'ng'iroq qilardi, kechki ov­qat yoki sayrga chaqirardi. Bunday inson haqida salbiy fikr bildirishim to'g'ri emas. Umuman, Zlatanga hamisha hurmat bilan qaraganman. U hattoki, o'z biografiyasida men haqimda yozgandi, aks holda, kitobi to'lmay qolardi. Endi Ibraga javob bermayman, munosabatimiz shundayligicha qolgani ma'­qul. Bu haqda boshqa gapirmayman.

- Simone Inzagi qanday murabbiy?

- Futbolni tushunadigan va o'zini jamoaga yaqin oladigan yaxshi inson. Yakunlangan mavsum uning uchun og'ir sarguzasht bo'ldi. Muhimi, Inzagi qiyinchiliklarni engib o'tdi. U meni chindan ham, «Inter»­da ko'rishni istagandi va yakunda xuddi shunday bo'ldi.

M.PO'LATOV tayyorladi