Sport kurashlari va og'ir atletika bo'yicha terma jamoamiz vakillari Osiyo chempionatidan qaytib kelishdi

Aprel oyi turli sport turlari bo'yicha qit'a birinchiligiga boy bo'ldi. Xitoy bir vaqtning o'zida 2 sport turi bo'yicha qit'a birinchiligiga mezbonlik qildi.

Tsian shahrida 23-28 aprel kunlari sport kurashlari, Ninbo shahrida esa 20-28 aprelda og'ir atletika bo'yicha Osiyoning eng kuchli sportchilari raqobat olib borishdi. Unda ishtirok etgan vakillarimiz yuqori natijalar bilan bugun Toshkent Xalqaro aeroportiga qaytib kelishdi. Qahramonlarimizni kutib olish marosimida sport muxlislari, atletlarimizning yaqinlari OAV vakillari ham ishtirok etdilar.

Eslatib o'tamiz, sport kurashlari bo'yicha terma jamoamiz vakillari esa qit'a chempionatida 2 ta oltin, 3 ta kumush va 5 ta bronza medallarini jamg'arishdi.

Yunon-rim kurashi bo'yicha polvonlarimiz umumjamoa bo'yicha qit'amizda ikkinchi o'rinni qo'lga kiritishdi. Og'ir atletika bahslarida esa sportchilarimiz 4 ta kumush va 3 ta bronza medallarini, shuningdek, 2 ishtirokchimiz yoshlar o'rtasida jahon rekordini yangilashga ham muvaffaq bo'ldi.