Saudiya klubi Ronaldu bilan muzokara olib borganini rad etdi

Saudiya Arabistonining “Al-Kavkab” klubi “Manchester Yunayted” hujumchisi Krishtianu Ronaldu borasida bayonot berdi. Oldinroq OAV arab klubi hujumchiga yiliga 125 million evro to'lashga tayyorligi haqida xabar bergan edi.

"Rasmiy e'lon: Portugaliyalik futbolchi Krishtianu Ronaldu va "Al-Kavkab"ning munosabatlari haqidagi mish-mishlar haqiqatga to'g'ri kelmaydi. Futbolchi klubning rejalariga mutlaqo kiritilmagan”, — deyiladi klubning Twitter'dagi xabarida.

Eslatib o'tamiz, o'tgan yozda Ronaldu 2003 yildan 2009 yilgacha o'ynagan "Manchester Yunayted"ga qaytgan edi. Hujumchi o'tgan mavsumda 38 o'yinda 24 ta gol urdi va 3 ta golli uzatmani amalga oshirdi.