Runi: "Suaresni hurmat qilaman, biroq..."

"Di Si Yunayted"ning yangi bosh murabbiyi Ueyn Runi hujumchi Luis Suaresning o'z jamoasiga o'tishiga qarshi chiqdi.

Bu haqda angliyalik mutaxassis "Di-Si Yunayted" murabbiyi maqomida "Kolumbus Kryu"ga (2:2) qarshi o'tkazilgan birinchi o'yindan so'ng ma'lum qildi.

"Men Luisni juda hurmat qilaman, u aql bovar qilmaydigan futbolchi, ammo menga g'alabaga chanqoq futbolchilar kerak. Jamoamizga bizda o'ynamoqchi bo'lgan, klubga ko'p narsa berishga tayyor va har bir uchrashuvda maydonga tushib, har bir mashg'ulotda qatnasha oladigan futbolchilarni kelishini istayman.

Biz aniq qaysi futbolchilar kerakligini aniqlash ustida qattiq ishlayapmiz. Ishonchim komilki, yaqin kelajakda biz transferlar bo'yicha bir nechta e'lon qilamiz", - dedi Runi Goal portaliga.

Avvalroq, 35 yoshli Suares faoliyatini MLSda davom ettirish variantini ko'rib chiqayotganini aytgandi. Urugvaylik futbolchi ​​2021/22 yilgi mavsum yakunida shartnoma muddati tugagani sababli, “Atletiko”ni erkin agent sifatida tark etdi.