OFK kubogi tufayli «So'g'diyona» stadionida qator ishlar amalga oshiriladi

Xalqaro maydon yaxshi narsa. Yaqindagina "Lokomotiv" stadionida media tribuna foydalanishga topshirilgandi. Iyul yakuniga qadar "So'g'diyona" stadionida ham qator ishlar amalga oshadi.

"So'g'diyona" 17 avgust kuni OFK kubogining pley-off bosqichida "Xo'jand"ga qarshi maydonga chiqishi kerak. OFK ertaga mazkur bellashuv qaysi shaharda o'tishiga oydinlik kiritib beradi. Mamlakat chempioni sifatida "So'g'diyona-W" klublar o'rtasidagi Osiyo chempionatini Qarshida o'tkazadi. Chunki bu erdagi stadion xalqaro talablarga javob beradi.

30 yil deganda xalqaro maydonni ko'rayotgan "So'g'diyona" shu oy yakuniga qadar CIP sektor, media tribuna, komissar va inspektor uchun alohida joy qiladigan bo'ldi. Matbuot anjumanlari xonasi audio tizim bilan jihozlanadi. Tibbiyot xonasi qayta jihozlanadi. Asosiy kamera turadigan joy kengaytiriladi va bir vaqtning o'zida 4 ta kamera faoliyat olib borishiga sharoit qilinadi.

Gazon qarovi ham avvalgidan yaxshiroq. Biroq yangi mavsum uchun baribir yangi gazon va drenaj sistemasini yaxshilash talab etiladi. Ayni vaqtda "So'g'diyona" klubi rahbariyati buning ustida bosh qotiryapti.

So'nggi ikki yilda maydon, baza, akademiya holati masalasi rahbariyat e'tiboriga chiqqani yutug'imiz. Tez orada "Neftchi" "Istiqlol"ga qaytsa, "Olimpik" "Jar"da o'ynay boshlasa, Termizda ish boshlansa — holat yanada yaxshilanadi.

Diyor Imomxo'jaev.