"Brentford" 16 million funt to'lashga tayyor

The Athletic xabariga ko'ra, "Brentford" klubi "Xall" hujumchisi Kin Lyuis-Potterni sotib olishga yaqin turibdi.

Manbaga ko'ra, "asalarilar" 21 yoshli ingliz uchun 16 million funt to'lashga tayyor, transfer summasi bonuslar bilan birga 20 million funtga ko'tarilishi mumkin. Ma'lum bo'lishicha, futbolchi kelishuvni yakunlash uchun tez orada tibbiy ko'rikdan o'tadi.

2021/22-yilgi mavsumda Lyuis-Potter “Xall” safida barcha musobaqalarda 48 ta o'yinda 13 ta gol urdi va 3 ta golli uzatmani amalga oshirdi. Transfermarkt.com portali futbolchining narxini 10,8 million funtga baholagan.