Baxtiyor Ashurmatov: “Jamoani yuqorirok darajaga olib chiqa olmaganligim uchun aybdorlik hissi ila jamoa bilan xayrlashmokdaman”

Avval xabar berganimizdek "Qo'qon-1912" jamoasida bosh murabbiy o'zgardi. Baxtiyor Ashurmatov jamoadan ketar ekan klub matbuot xizmatiga o'zining so'nggi fikrlarini bayon qildi hamda barcha jamoa a'zolari hamda muxlislarga o'zining minnatdorligini bildirdi.

- Assalomu alaykum hurmatli “Qo'qon-1912” jamoasining fidoyi muxlislari. Mana jamoada 2,5 yil ishlaganimdan keyin sizlar bilan xayrlashadigan payt keldi. Mening “Qo'qon-1912” jamoasida ishlashim uchun menga ishonch bildirgan,meni qo'llab quvvatlagan jamoa rahbari, Qo'qon futbolining jonkuyari, ”Qo'qon-1912” jamoasining shuncha yil davomida superligada o'ynashiga o'z hissasini qo'shgan oliyjanob inson, Baxtiyoraka Tolipovga, jamoani har tomonlama qo'llab quvvatlagan jamoamizning jonkuyar rahbarlariga, jamoani yaxshi kunida xam, og'ir kunida xam qo'llab quvvatlab turgan “Qo'qon-1912” jamoasining betakror, fidoyi, jamoa uchun jonini fido kiladigan ajoyib muxlislariga, jamoada men bilan aka ukadek bo'lib ketgan futbolchilarga, jamoada ishlagan xar bir xodimga o'z minnatdorchiligimni bildiraman va chin yurakdan rahmat deb qolaman.

Jamoani qabul qilib olganimda bosqichma bosqich jamoani yukori darajaga olib chiqishni va Osiyo chempionlar ligasiga chiqishni maqsad qilib qo'ygandik. Xudoga shukr muxlislarimizning qo'llab quvvatlashlari bilan birinchi bosqichdan yorug' yuz bilan o'tdik. Jamoa ikki yil davomida autsayderlar katoridan jangovar, o'z oldiga yuqori maqsadlarni qo'ya oladigan jamoaga aylandi. Yanada kuchayish va medallar uchun kurashadigan jamoalar qatoriga qo'shilishimiz uchun 2021-yildagi tarkibni saqlab qolish va bu jamoa qatoriga 4-5 ta kuchli futbolchilarni qo'shish talab etilardi. Shunda jamoa bemalol yuqori o'rinlar uchun kurasha olardi. Lekin afsuski 2021-yilgi tarkibni ayrim sabablarga ko'ra saqlab qola olmadik va jamoani kuchaytira olmadik. Bu xolat natijaga baribir o'z ta'sirini o'tkazdi.

Jamoani yuqorirok darajaga olib chiqa olmaganligim uchun aybdorlik hissi ila jamoa bilan xayrlashmokdaman. Lekin ishlagan paytimda futbolchilarni faqat to'g'ri yuldan borishga undadim. Yutsak halol yutdik, yutqazsak halol yutkazdik. Shu sababli yaratganning oldida ham, muxlislarimiz, rahbarlarimiz oldida ham vijdonimiz toza, yorug' yuz bilan xayrlashmoqdaman.

Muxlislarimiz hohlagan Osiyo chempionlar ligasiga chiqolmaganimiz uchun qo'qonlik muxlislar oldida qarzdorman va Xudo xohlasa vaqti soati kelib, yana Qo'qonda ishlayman deb umid kilib qolaman. Muxlislarimiz doimo sog' salomat bo'lishlarini, xonadonlarida fakat xursandchilik kunlar bo'lishini tilab qolaman. “Qo'qon-1912” jamoasi va Qo'qonlik muxlislar doimo qalbimda bo'lishadi. Jamoa rahbariyatiga va barcha jamoa a'zolariga omad tilayman! Muxlislarimizni doimo hurmat qilganman, qadrlaganman. Yaxshi kunlarda yana ko'rishguncha deb qolaman. Muxlislarimizga, “Qo'qon-1912” jamoasiga mehr bilan Baxtiyor Ashurmatov".

Manba: "Qo'qon-1912" klubi matbuot xizmati