Midori Xonda: «Kelajakni o'ylagan holda ish olib boryapmiz»

O'zbekiston ayollar milliy terma jamoasi bosh murabbiyi Midori Xonda CAFA turniri oldidan jamoalar bosh murabbiylari ishtirokida o'tkazilgan matbuot anjumanida qatnashdi.

"Milliy terma jamoalar uchun ilk bor o'tkazilayotgan ushbu turnirni intiqlik bilan kutdik, boisi turnirda ishtirok etish har bir jamoa uchun foydali bo'lishiga ishonchim komil.

Bosh murabbiy etib tayinlanganimdan buyon Turkiyada yig'in o'tkazdik va u erda o'rtoqlik turnirida ishtirok etdik. Shuningdek, AQSh termasiga qarshi 2 ta safar o'yinini o'tkazdik. O'ylashimcha, bu boradagi harakatlarimiz oldinni o'ylab qilingan ishlar sirasiga kiradi. Chunki mazkur o'yinlarda barcha raqiblarini mag'lub etish vazifasini o'z oldimizga qo'ymaganmiz. Biz, birinchi galda, qizlarimizni tekshirib olish va xalqaro uchrashuvlardagi tajribalarini orttirishni maqsad qilgandik", — dedi yaponiyalik mutaxassis.

Shuningdek, matbuot anjumanida ishtirok etgan Eron ayollar terma jamoasi bosh murabbiyi Maryam Azmun ushbu turnirda O'zbekiston va Eron terma jamoalari favorit ekanligini, yaponiyalik mutaxassisning O'zbekiston ayollar terma jamoasiga bosh murabbiy etib tayinlanganidan xursandligini aytib o'tdi. Murabbiy O'zbekistonning AQShga qarshi o'yinlarini kuzatgani, yaxshi natijalarga erishish uchun eng kuchli raqiblarga qarshi o'ynash muhimligini qo'shimcha qildi.

Eslatib o'tamiz, O'zbekiston ayollar milliy terma jamoasi CAFA turniridagi ishtirokini 11 iyul kuni Tojikistonga qarshi o'yin bilan boshlaydi.

Manba: ufa.uz