Roy Kin agar Ronaldu "Chelsi"ga o'tsa nechta gol urishini taxmin qildi

Britaniyalik futbol mutaxassisi Roy Kin Krishtianu Ronaldu "Chelsi"ga o'tsa, qancha gol urishini taxmin qildi.

Aprel oyida "Manchester Yunayted" londonliklar bilan to'qnash kelganida, Ronaldu Markos Alonsoning golidan bir daqiqa o'tib hisobni tenglashtirdi. O'shanda Kin portugaliyalik futbolchining o'yinini yuqori baholab, Tomas Tuxel jamoasida 50 ta gol urishini aytgandi.

"Gol urish eng qiyin narsa. Tasavvur qiling, agar Ronaldu "Chelsi"da o'ynasa, qancha gol urar edi. 50 ta! Undan kam emas!" - degandi Kin o'yindan so'ng.

Ayni paytda portugaliyalik futbolchining yangi klubi haqidagi mish-mishlar kundan-kunga ortib bormoqda. Biroq transfer eksperti Fabritsio Romano portugaliyalik hozircha hech kim bilan muzokaralar olib bormayotganini va u hali “Yunayted” bosh murabbiyi Erik ten Xag bilan gaplashgani yo'qligini ta'kidladi.

Oldinroq Ronaldu Manchesterni tark etishga qaror qilgani, chunki u klubning joriy mavsumdagi transfer bozoridagi sust siyosatidan norozi bo'lgani haqida xabar berilgandi.