Futzal bo'yicha Osiyo kubogiga tayyorgarlik rejalari muhokama qilindi

Xabaringiz bor, joriy yilning sentyabr-oktyabr oylarida Kuvaytda futzal bo'yicha Osiyo kubogi musobaqalari bo'lib o'tadi. Mazkur qit'a birinchiligida O'zbekiston futzal milliy terma jamoasi ham ishtirok etadi.

O'FA birinchi vitse-prezidenti Ravshan Ermatov Osiyo kubogi musobaqasiga tayyorgarlik rejalari va o'quv-mashg'ulot yig'inlarining jadvali bilan tanishish maqsadida O'zbekiston futzal milliy terma jamoasi murabbiylari Bahodir Ahmedov va Nodir Eliboev bilan uchrashdi.

Suhbat davomida oldimizda turgan Osiyo kubogi musobaqalariga tizimli tayyorgarlik ko'rish, o'quv-mashg'ulotlarini sifatli tashkil etish, bir qancha jamoalar bilan o'rtoqlik uchrashuvlari o'tkazish masalalari muhokama qilindi.

Shuningdek, tayyorgarlik jarayonida barcha detallarga e'tibor qaratish borasida ko'rsatmalar berildi. O'z navbatida bu borada O'FA tomonidan barcha sharoitlar tashkil qilib berilishi ma'lum qilindi va keyingi rejalar muhokama qilib olindi.

Ma'lumot uchun, O'zbekiston futzal milliy terma jamoasining yig'ini 4 iyul kuni boshlandi. Mazkur yig'in doirasidagi mashg'ulotlar 18 iyulga qadar davom etadi.