Belarus chempionati. Abduxoliqovning goli peshqadam bilan o'yinda «Energetik-BGU» 1 ochko keltirdi (video)

Belarus chempionatining 13-turi doirasida markaziy o'yin bo'lib o'tdi. Musobaqa peshqadami BATE o'z maydonida ikkinchi pog'onada borayotgan «Energetik-BGU»ni qabul qildi.

Mezbonlar 2-daqiqadayoq Dragun tomonidan urilgan gol evaziga hisobni ochishdi. "Talabalar"ning urinishlari esa 73-daqiqada o'z samarasini berdi va hakam BATE darvozasi tomon penalti belgiladi. Abduxoliqov tomonidan yo'llangan zarbani darvozabon qaytardi. Qaytgan to'pga Boburning o'zi etib keldi va darvozani ishg'ol qildi. Mazkur hisob o'yin oxirigacha o'zgarmay qoldi.

Bobur Abduxoliqov mavsumdagi gollari sonini 14taga etkazib oldi va to'purarlar ro'yxatida yaqqol peshqadam bo'lib turibdi. U yaqin ta'qibchisidan 7ta to'pga o'tib ketdi. Hamyurtimiz bugungi bahsning qo'shi berilgan daqiqalarida zaxiraga olindi. Shuningdek, o'zbekistonlik himoyachi Abduqodir Husanov va yarim himoyachi Shohruh Abdurahmonov bahsda to'liq ishtirok etishdi.

Mazkur durang tufayli BATE va «Energetik-BGU» o'rtasidagi bir ochkolik tafovut saqlanib qoldi.

Belarus chempionati, 13-tur
BATE — ENERGETIK-BGU — 1:1
BATE: Kudravets — Dragun (k), Bocherov, Nechaev, Villyumsson (Sharkovskiy, 80), Bordachev, Gromiiko (Shumanskiy, 46), Milich, Oreshkevich (Vasilevich, 74), Filipovich, Malkevich.
ENERGETIK-BGU: Makavchik — Abdurahmonov, Silinskiy (Pashevich, 78), Riilach, Makushinskiy, Abduxoliqov (Kunskiy, 91+), Svirepa (k) (Semenov, 57; Omelyanchuk, 83), Grishenko (Gvaradze, 59), Husanov, Lukashevich, Lavrik.
Gollar: 1:0 — Dragun (2). 1:1 — Abdixolikov (73).
Ogohlantirish: Husanov (65).
Golga aylanmagan penalti: Abduxoliqov (73, Energetik-BGU).