Dembele "Barselona" bilan shartnoma imzolashga yaqin turibdi. Maoshi keskin kamaygan

"Barselona"ning endilikdagi sobiq hujumchisi Usmon Dembele Kataloniya klubi bilan yangi shartnoma imzolashga yaqin turibdi, deb xabar bermoqda Diario Sport.

Eslatib o'tamiz, avvalroq "ko'k-anorranglilar" rahbariyati 25 yoshli frantsiyalik futbolchi bilan shartnomani 1 iyulga qadar uzaytirishga ulgurmagani uchun Dembele rasman erkin agentga aylandi.

Manbaga ko'ra, kelishuvni yakunlash uchun avvalroq Dembele bilan shartnomani uzaytirishga qarshi chiqqan "Barselona" direktori Mateu Alemanining roziligini olishgina qoladi. Yangi shartnoma 2024 yilning yoziga qadar amal qilishi kutilmoqda, unga ko'ra vinger avvalgiga qaraganda 40 foizga kamroq maosh oladi.

Frantsiyalik futbolchi o'tgan mavsumda kataloniyaliklar safida 42 ta o'yinda maydonga tushib, 2 ta gol urdi va 13 ta golli uzatmani amalga oshirdi.