JCh-2026 formati bo'yicha reja o'zgarishi mumkin

Xabaringiz bor, FIFA 2026 yilgi jahon chempionatidan boshlab ishtirokchilar sonini 48taga oshiradi. Dastlabki rejaga ko'ra, unda jamoalar 16ta guruhga bo'linishi va har bir guruhda 3tadan terma jamoa o'rin olishi rejalashtirilgandi. Guruhdan 2tadan jamoa pley-off chiqib, u yog'i olimpiya tizimida davom etishi kerak edi. Bunda jami 80ta uchrashuv o'tkazilar edi.

Ammo ushbu format haqli ravishda tanqidlarga uchragandi. Boisi, bir jamoa guruh bosqichini ertaroq yakunlagani bois, so'nggi turda to'qnash keladigan jamoalarning o'zaro kelishgan holda o'yin o'tkazish ehtimoli oshadi.

Shu bois, FIFA JCh-2026ni boshqacha formatda o'tkazish haqida o'ylay boshladi. Yangi loyihaga ko'ra, jamoalar 4tadan 12ta guruhga bo'linishadi. Guruh bosqichida dastlabki 2ta o'rinni egallagan jamoalar hamda 3-o'rinni band etganlar orasida eng yaxshi ko'rsatkichga ega bo'lgan 8ta jamoa 1/16 final bosqichi yo'llanmasini qo'lga kiritadi. Bu formatda o'yinlar soni 114taga etadi.