Diyor Imomxo'jaev: «Futbolda to'g'ri va halol ishlashda gap ko'p»

O'zPFL rahbari Diyor Imomxo'jaev maydonlarimiz sifati va professional futbol haqida gapirdi.

«Biz maydonlarni yaxshilab borishda shunday davom etsak, kartoshka dalalarida Braziliyani ham mag'lub etadigan murabbiylar chetga chiqib boradi. Yaxshi, sifatli va kambinatsion futbol uchun yaxshi maydonlar shart. Bolalar to'g'ri pas berishni o'rganishi, normal futbol qanday bo'lishini his qilishida bu muhim omil.

3 ga 3 kelishib oladigan, o'z uyida hammani yutadigan, raqib maydonida o'yinni beradigan noinsoflar kamayib borishidan manfaatdormiz. Futbolchilar masala kiyim almashtirish xonasida emas, maydonda hal bo'lishini tushunib etishlari, hakamni ko'riboq duxni berishlari emas, hakamlariga qo'shibda er tishlatishga tayyor jangchilarga aylanishlari shart. Bugungi hakamlar o'zgaryapti, faqatgina kecha hamma joyni rasvo qilib, bugun ularga baho qo'yayotgan yoki aql berayotganlarga ham bosqichma-bosqich chiqish eshiklarini ko'rsatishimiz, toza ishlamoqchi bo'lgan hakamlarga ko'proq imkoniyat berish yo'lidan yurishimiz kerak, shunday bo'ladi ham.

Bizning muxlislar g'alaba uchun pastkashlikka boradiganlardan ko'ra, mardonavor kurashib engiladiganlarni qadrlaydi. Futbolda g'alaba bilan mag'lubiyat yonma-yon. Muhimi munosib bo'la olish, yiqilganda qayta oyoqqa tura olish. Biz Osiyo yoki Evropadagi joyimizni o'zgartirish haqida emas, qarashlarimizni o'zgartirish ustida ishlayapmiz. Xudo xohlasa hammasi yanada yaxshi bo'ladi», — deydi O'zPFL rahbari.