Kreativ karikaturalar ustasi Omar Mo'maniy haqida nimalarni bilasiz?

Karikatura (italyancha caricare — „oshirish“, „urg'u berish“) deb satirik yoki hajviy tasviriy san'atga aytiladi. Satirik karikaturada ijtimoiy, siyosiy va boshqa muammolar fosh etiladi, korruptsiyaga berilganlar tanqid qilinadi. Hajviy karikatura esa biror kimsani tanqid qilmay, shunchaki kundalik mavzularni kulgili yoritadi.

Karikatura qadimdan chizib kelinadi. Siyosiy karikaturalar Qadimgi Rimda ham tarqalgan edi. O'zbekistonda karikatura maktabi “Mushtum” jurnali va keyinchalik unga hamroh “Afandi” gazetasi faoliyati bilan bog'langan. O'zbek karikaturachilar safiga Telman Muhamedov, Alijon Xoliqov, Narimon Ibrohimov, Emil Ro'ziboev, Sur'at Salohitdinov, Husan Sodiqov, Javlon Nazarov va boshqalar kirishadi.

Bugungi kunda sport sohasida ham karikatura chizish juda ham ommalashib bormoqda. Futbol muxlislari esa Omar Mo'maniyni bugungi kundagi eng mashhur va ob'ektiv futbol karikaturachilaridan biri, deb hisoblashadi. Iordaniyalik ijodkor Goal.com saytida o'z ijod na'munalarini e'lon qilib keladi.

Bundan tashqari, u boshqa bir qancha loyihalar bilan shug'ullanadi: siyosatchilarni yoki shunchaki hazil-mutoyibalarni chizadi, u o'zining birinchi qisqa metrajli animatsion filmining prodyuseri, internetda avtobiografik komiksni nashr etishni rejalashtirmoqda. Futbol yulduzlari uning “hazillari”ga ijobiy munosabatda bo'lishadi.

Rassom o'zini “Milan” jamoasining doimiy muxlisi deb biladi. Bolaligidagi sevimli futbolchisi esa Roberto Badjo. Bugun esa u Messini eng zo'ri, deb hisoblaydi.

Uning ish uslubi 30 yillarning klassik karikatura chizmasi ta'sirida shakllangan. Bundan tashqari, karikatura rassomi Piter Baggening asarlari uni ilhomlantiradi.

Goal.com asosan Angliya va Ispaniya chempionatlarida bo'lib o'tayotgan voqealarni chizish uchun topshiriq beradi: birinchisi Evropadagi eng ommabop chempionatlardan biri hisoblanadi, ikkinchisining ishtirokchilari esa “Barselona” va “Real Madrid” bo'lib, ularda talab yuqori bo'lgan futbolchilar to'p tepadi.

Rassomning so'zlariga ko'ra, statik tasvir animatsiyaga qaraganda kamroq ma'noni etkazish qobiliyatiga ega. Yaqinda u futbol mavzusidagi multfilmlarni o'z ichiga olgan YouTube kanalini ochdi. Rassom ushbu yo'nalishni ham rivojlantirishni rejalashtirmoqda.

Endi Omar Mo'maniy harakat va fantaziya cheklanmaydigan to'liq hajmdagi multserial yaratish ustida bosh qotirmoqda va buning uchun homiy izlamoqda.