U23 Osiyo kubogi yakunlari bo'yicha ba'zi ma'lumotlar e'lon qilindi

OFK O'zbekistonda bo'lib o'tgan 23 yoshgacha bo'lgan futbolchilari o'rtasidagi Osiyo chempionati yakunlari bo'yicha ba'zi statistik ma'lumotlarni taqdim etdi. Manbaga ko'ra, ushbu Osiyo kubogini OFKning ijtimoiy tarmoqlari orqali 340 million kishi kuzatib borgan. Bu esa ikki avval Tailandda o'tkazilgan musobaqaga nisbatan 194 foizga ko'p hisoblanadi.

Eng ko'p kuzatuvchi video materiallarni tomosha qilgan bo'lib, musobaqa davomida bunday materiallarning kuzatilishi 46.9 milliontani tashkil etgan. Bu esa 2020 yilgi musobaqaga nisbatan 10,6 baravar ko'pni tashkil etadi. OFK tomonidan yangi ochilgan TikTok ijtimoiy tarmog'idagi sahifaga bir millionga yaqin inson obuna bo'lgan bo'lib, ular qo'yib borilgan videolarni jami 9,3 million marta tomosha qilishgan.

OFKning Twitter'dagi sahifasi O'zbekistonda katta qiziqish uyg'otgan. Mazkur tarmoqdagi foydalanuvlarning faolligi ikki yil avvalgiga nisbatan 217 foizga oshgan.

Instagram'dagi kuzatuvlar soni 115,65 millionni tashkil etgan bo'lsa (119% o'sish), Facebook'dagi o'yish 80 foiz bo'lgan (110 million).

19 kun davomida o'tkazilgan 32ta o'yinda darvozalarga jami 81ta to'p kiritildi. O'rtacha samaradorlik 2,53 golni tashkil etdi. Saudiya Arabistoni o'z darvozasidan birorta ham gol o'tkazmagan yagona jamoa bo'ldi.

Musobaqa davomida muxlislarning stadionga tashrifi bo'yicha rekordlar bir necha marta yangilangan. Xususan, O'zbekistonning Tukrmanistonga qarshi ilk ochilish o'yinga 28670 ishqiboz tashrif buyurgan bo'lsa, finalni 32 268 muxlis "Bunyodkor" stadionida kuzatib borgan.