No''mon Hasanov: «Hakam penaltini kutib turgandek tuyuldi»

Superliga 6-tur doirasidagi “Metallurg” – “Qo'qon-1912” uchrashuvidan keyingi matbuot anjumanining birinchi qismida jamoamiz ustozi No''mon Hasanov ishtirok etdi.

- O'yinni o'zlaring ham ko'rdilaring. Avvalo, “Metallurg”ni g'alaba bilan tabriklayman. Penalti qo'yilgan vaziyatga e'tirozim bor. Menimcha, bu vaziyatda qoida buzilmagan edi. Nazarimda hakam shunday vaziyat bo'lishini kutib yurgandek ko'rindi. Darhol o'n bir mertli nuqtaga ishora qildi. O'sha vaziyat o'yinga ta'sir o'tkazdi. Birinchi bo'lib gol urdik va hammasi yaxshi ketayotgandi. Takror aytaman, penalti natijaga salbiy ta'sir ko'rsatdi.

Shogirdlarim bugun yaxshi o'ynashdi. Hisobni ochganimizdan keyin ularning kayfiyati ko'tarildi. Penalti bo'lmaganida ehtimol boshqacha hisob bo'larmidi?

O'sha vaziyatdan keyin futbolchilarim sinib qoldi deb ayta olmayman. Lekin baribir alamli bo'ldi. Himoyachimiz nima qilishi kerak edi o'sha holatda. Chalib yiqitsa yoki qo'l bilan o'ynasa tushunsa bo'ladi.Futbolda bunday vaziyatlar uchrab turadi. Futbolchilarim ham gol urish uchun ko'plab vaziyatlar yaratishdi, ularga etirozim yo'q.