Ulug'bek Baqoev: «Ertaga faqat g'alaba uchun o'ynaymiz»

OFK kubogi "E" guruhida ertaga 3-tur bahsi bo'lib o'tadi. "So'g'diyona" Turkmanistonning "Oltin asr" klubi bilan pley-off bosqichi yo'llanmasi uchun kurash olib boradi. Jizzaxliklar bosh murabbiyi Ulug'bek Baqoev mazkur o'yin oldidan o'z fikrlari bilan o'rtoqlashdi.

"Biz keyingi bosqichga chiqishimiz uchun hech qanday kafolat yo'q. Bunday imkoniyat "Oltin asr"da ham bor. Biz durang uchun o'ynamaymiz. Avvalgi o'yinlarda bo'lgani kabi ertaga ham faqat g'alaba uchun maydonga chiqamiz.

Har uch kunda o'yin o'tkazayotgan paytda futbolchilarning jismoniy holati muhim ahamiyatga ega. Shundan kelib chiqib uchinchi o'yinga tayyorgarlik ko'ryapmiz. Keyingi bosqichga chiqish uchun qo'ldan kelgan barcha ishni qilamiz. O'yinchilar bilan gaplashib olish uchun bugun va ertaga vaqt bo'ladi. Ammo ular men nima kutayotganimni yaxshi bilishadi. Futbolchilar bu erga nima uchun kelganimizni bilishadi. Shuning uchun ular g'alaba uchun borlarini berishadi", — dedi Baqoev.