«Benfika»: Pul topish formulasi

«Benfika» 3 nafar futbolchi transferidan 246 million evro ishladi.

O'zi Lissabon klubida munosib iqtidorlarni izlab topish va ularning yangi darajaga chiqarib, katta summada sotish tizimi konveyer darajasiga ko'tarilgan allaqachon. Farqi shuki, «Benfika» oldin ham son, ham baho ustida jiddiy ishlardi. Deylik, 30-40 million evro taklif etilsa, eng yaxshi «topilma»larini ham qo'yib yuboraverardi. Misol uchun, «Zenit» va «Manchester Siti» tegishlicha Aksel Vittsel hamda Ederson transferiga 40 million evro to'lagan. «Benfika» shuningdek, Nelson Semedu («Barselona»ga), Viktor Lindelyof («MYu»ga) va Renatu Sanshesh («Bavariya»ga)ni 35-36 million evroga sotishdan qaytmagandi. Endi esa lissabonliklar futbol bozorida yangi darajaga chiqishdi. Buyog'iga «Benfika» ixtiyoridagi iqtidorlarga xaridor klublar chamasi 100 million evro to'lashga majbur. Bunga 3ta transferni yorqin misol sifatida keltirish mumkin.

Joau Felish

Klub tarbiyalanuvchisi. E'tiborli tomoni, Lissabon klubi Felishni ashaddiy raqibi «Portu» yoshlar maktabidan «Padroense» tranziti yordamida o'z tomoniga og'dirgandi. Joau 2019 yilning yozida 127,2 million evro evaziga «Atletiko»ga yo'l oldi. Bu ham sotuvchi, ham xaridor klub uchun o'z tarixidagi rekord kelishuv bo'ldi.

Ruben Diash

«Benfika» keyingi yoz, ya'ni 2020 yili yana bir yirik kelishuvni rasmiylashtirdi. Hujjatlarda ko'rsatilishicha, «Manchester Siti» himoyachi Ruben Diash transferiga 68 million evro to'ladi. Qolaversa, «shaharliklar» «burgutlar» maktabi tarbiyalanuvchisiga ega bo'lish yo'lida Nikolas Otamendini ham Lissabon jamoasiga berishdi.

Darvin Nunes

Bahosi 100 «limon»ga tortadigan yangi transfer. Ha, «Liverpul» Darvin Nunes uchun aslida 75 million evro to'laydi, lekin bonuslar hisobiga bu summa ancha oshishi mumkin. Diqqat qiling, «Benfika» urugvaylik hujumchini 2020 yilning yozida «Almeriya»dan atigi 24 million evroga sotib olgandi. Qarang, Nunesning bahosi qandaydir 2 yilda uch baravar oshdi.

«Benfika» futbol bozorida qanday ishlashni yaxshi biladi, albatta. Deylik, klub oxirgi 4 mavsumda atigi 3 nafar futbolchi ortidan 246 million evro oldi! Shunchaki, fantaziya! 

«Benfika» tomonidan sotilgan eng qimmatbaho 10 nafar futbolchi

1 Joau Felish («Atletiko»ga) - 127,2 mln.

2 Darvin Nunes («Liverpul»ga) - 75 mln.

3 Ruben Diash («Manchester Siti»ga) - 68 mln.

4 Ederson («Manchester Siti»ga) - 40 mln.

5 Aksel Vittsel («Zenit»ga) - 40 mln.

6 Raul Ximenes («Vulverxempton»ga) - 38 mln.

7 Nelson Semedu («Barselona»ga) - 35,7 mln.

8 Viktor Lindelyof («MYu»ga) - 35 mln.

9 Renatu Sanshesh («Bavaria»ga) - 35 mln.

10 Anxel di Mariya («Real»ga) - 33 mln.

D.ALIMOV  tayyorladi

Manba: «Interfutbol» gazetasi