A seriya. Keyingi mavsumdan «oltin o'yin» qoidasi joriy etildi

Italiya chempionatining yangi mavsumi uchun yangilangan reglamenti tasdiqlandi. Reglamentga «Oltin uchrashuv» qoidasi kiritildi.

Unga ko'ra, mavsum yakunida chempionlik uchun kurashayotgan ikki jamoaning ochkolari teng kelib qolsa, g'olibni aniqlash maqsadida «Oltin uchrashuv» o'tkaziladigan bo'ldi. Bu o'yinda qo'shimcha bo'limlar bo'lmaydi. Agar g'olib 90 daqiqada aniqlanmasa, navbat penaltilar seriyasiga beriladi.

Aytib o'tganimizdek, ushbu qoida faqat chempion jamoani aniqlash uchun joriy etiladi. Ochkolar teng kelib qolganda evrokuboklarga beriladigan yo'llanmalarni aniqlashda o'zaro o'yinlar hisobga olinadi.

Bundan tashqari, A seriyaning bitta o'yinida beshtadan o'yinchi almashtirish qoidasi saqlab qolindi.

Eslatib o'tamiz, mavsum-2021/2022da «Milan» asosiy ta'qibchisi «Inter»ni 2 ochko ortda qoldirgan holda chempionlikni qo'lga kiritdi.