Iqtidorli bolakaylikdan super yulduzlikka qadar: Kilian Mbappe

2016-2017 yilgi mavsumdan boshlab dunyo futbol ahli Kilian Mbappe Lottin ismli yosh va iqtidorli futbolchi nomini taniy boshladi. U "Monako" safida harakat qilardi. Tabiiy qobiliyati hamda o'ta kuchli tezligi hujumchining katta yutuqlari edi. Ammo Mbappe bu qobiliyatlariga yana bir nechta kerakli jihatlarni qo'sha oldi. Bu esa uni etuk hujumchiga aylantirdi. O'sha mavsumda Mbappe EChLda raqiblar uchun katta xavfga aylandi. Xususan, nimchorak finalda "Manchester Siti"dek jamoaga har ikki davrda gol urishga erishdi. O'sha o'yin yakuni umumiy 6-6 bilan yakun topgan. "Monako" esa mehmondagi gollari hisobiga keyingi bosqichga yo'l oladi. Mbappe bunda katta ishni bajargan. Ko'p o'tmay, u katta-katta klublar nazariga tusha boshladi.

2021 yil hujumchi faoliyatidagi eng sermahsul davr bo'ldi. Mbappe yil davomida jami 67 ta o'yinda ishtirok etib, 51 ta golga mualliflik qiladi. Uning 51 ta urgan goli, Evropada ikkinchi eng yaxshi natija edi. Bu borada faqat Levandovskigina Mbappedan yaxshi natijaga erishgan (69 ta). Frantsuz futbolchisi o'sha paytda 22 ta assistga ham mualliflik qiladi. Shu orqali uning gollarda bevosita ishtirok etish ko'rsatkichi 73 taga etadi. Bu esa har bir o'yinda Mbappe 1,09 ta golda ishtirok etganini anglatadi. 2021 yil Mbappeni boshqa darajaga olib chiqqani bilan ham ajralib turadi. Frantsiya terma jamoasi a'zosi "PSJ"ga o'tgach, mutlaqo boshqa darajaga ko'tariladi.

Bugun 23 yoshda bo'lgan Mbappe ko'plab natijalari bilan rekordlarni yangilashga muvaffaq bo'ldi. Futbolchining keyingi manzili "Real Madrid" bo'lishi mumkin edi. Biroq, Parij klubi uni o'z jamoasida qolishga va kelajagini o'sha erda qurishga ko'ndira oldi.
Mbappening ilk yarqirashi 2016 yilda, U-19 Evropa chempionatida ro'y beradi. O'shandayoq, Mbappe oddiy futbolchi emasligini, kelajakda uni katta zafarlar kutishi mumkinligini namoyon qila olgan. "PSJ" futbolchisi bugungi imkoniyatlari bilan bir emas, bir nechta "Oltin to'p"ni yutsa bo'ladi.

Kilian 22 yosh ekanida EChL musobaqasida fantastik natijalarga erisha boshlagan. Xususan, o'sha yoshda bu ko'rsatkichni Samyuel Eto'o, Kaka hamda Ueyn Runilar ham qayd eta olmagan. U shuningdek, 21 yoshidayoq EChL finalchisiga aylanadi. Ammo finalda "Bavariya"ga imkoniyatni boy beradi. Shunday bo'lsada, Mbappe uchun hali hammasi oldinda. U 2016-17 yilgi mavsumdagi debyutidan buyon ayni damga qadar Evropdagi klublar o'rtasida eng nufuzli musobaqa sanalgan turnirda jami 54 ta golda ishtirok etdi. Ularning 31 tasi gol, 23 tasi assistdir (51 ta uchrashuvda). Ha, yuqoridagi ma'lumotlar sizga absurd bo'lib tuyulishi mumkindir. Ammo bu fakt!

Kilian Mbappe Frantsiyaning ichki chempionatida ham haqiqiy yirtqich instinktini ko'rsatib kelmoqda. U "PSJ" safida 124 ta o'yinda maydonga tushib, 100 ta gol urishga erishdi. U 100 ta gollik natijaga erishgan eng yosh futbolchi ham bo'lgan edi (22 yosh-u, 357 kun).

Mbappe faoliyati raqamlarda:
- Jahon chempionatida gol urgan eng yosh futbolchi (1958 yildan beri)
- 2018 yilgi JCh g'olibi
- JChning eng yaxshi yosh futbolchisi
- 2017 yilgi "Golden Boy" sohibi
- 2 karra Jahonning ramziy terma jamoasiga kirgan
- 4 karra Frantsiya chempioni
- 3 marta Frantsiya chempionatining eng yaxshi futbolchisi
- 2 marta Frantsiyada Yil futbolchisi
- 1 karra Frantsiya kubogi sohibi
- Evropa Millatlar ligasi bosh sovrini.

Yuqoridagi statistikalarning bari Mbappe dahosi haqida so'zlaydi. Bizda esa uni maqtash uchun ortiqcha so'z qolmadi hisob.

 

Jaloliddin ISMATOV tarjimasi

Manba: futaa.com