Saudiya chempionati. Masharipov 90+5-daqiqada «penanka» gol urib, jamoasiga g'alaba keltirdi (video)

Kecha Saudiya Arabistoni chempionatida so'nggi tur o'yinlari bo'lib o'tdi. "An-Nassr" klubi o'z maydonida "Al-Fat"ni qabul qilib, juda qiyin g'alabani qo'lga kiritdi.

Bahsning 13-daqiqasida mezbonlar Martinesning goli evaziga hisobni ochishgan bo'lsa, taym tugashiga 8 daqiqa qolganida mehmonlar muvozanatni tiklashdi.

Uchrashuvning 68-daqiqasida "An-Nassr" penalti tepish huquqini qo'lga kiritdi, ammo Taliska uni golga aylantira olmadi. Oradan 15 daqiqa o'tib esa Taliskaning o'zi maydondan chetlatildi.

O'yin qo'shib berilgan 5-daqiqada esa maydon egalari penalti tepish huquqini qo'lga kiritishdi. Jaloliddin Masharipov "panenka" uslubida gol urib, jamoasiga g'alaba keltirdi. Hamyurtimiz Saudiya Arabistoni chempionatining joriy mavsumida 26ta o'yinda ishtirok etib, 2 gol va 5 assist muallifiga aylandi. U kechagi uchrashuvning boshidan oxirigacha maydonda harakat qildi.

"An-Nassr" mavsumni 3-pog'onada yakunladi. "Al-Hilol" esa kechagi g'alaba evaziga chempionlikni qo'lga kiritdi. So'nggi turda durang o'ynagan "Al-Ittihod" esa finish chizig'ida chempionlikni boy berib qo'ydi.

Manba: stadion.uz