Vela "Los-Anjeles" bilan yangi shartnoma imzoladi

"Los-Anjeles"ning 33 yoshli hujumchisi Karlos Vela klub bilan shartnomasini bir yilga uzaytirdi. Bu haqda MLS klubi matbuot xizmati xabar berdi.

"Men kubok yutmasdan klubni tark etishni xohlamayman. Umid qilamanki, bu yil buni uddalay olaman”, - dedi Vela.

Taxminan bir hafta oldin Vela agar klub bilan yangi shartnoma borasida kelishmasa, "Los-Anjeles"ni tark etishga tayyorligini ma'lum qilgandi.

Avvalroq jamoa mashhur uelslik futbolchi Garet Beylning transferi haqida e'lon qilgan edi. Iyun oyi o'rtalarida jamoaga Italiyaning afsonaviy himoyachisi Jorjio Kellini ham kelib qo'shildi.

Vela AQSh futboli tarixidagi eng muvaffaqiyatli futbolchilardan biri sanaladi. U "Los-Anjeles" tarkibida MLSda 116 ta o'yinda maydonga tushib, 73 ta gol urdi va 33 ta golli uzatmani amalga oshirdi.