Taekvondochi yigitlarimizdan tarixiy natija! Janubiy Koreya umumjamoa hisobida ortda qoldirildi

Koreya Respublikasida taekvondo WT bo'yicha Osiyo chempionati o'z yakuniga etdi. Bugun -80 kg vazn toifasida ishtirok etgan hamyurtimiz Shuhrat Salaev qit'a chempionligini qo'lga kiritdi.

Taekvondochimiz finalda Tokio-2020 kumush medal sohibi iordaniyalik Solih El Sharabati bilan to'qnash keldi. Birinchi raundda Salaevning, ikkinchi bo'limda raqibning g'alabasi qayd etildi. Hal qiluvchi raundda Salaev 0:5 hisobida ortda borayotganiga qaramasdan kuchli xarakter ko'rsatib, 8:7 hisobida bellashuv taqdirini o'z foydasiga hal qila oldi. Ayniqsa, so'nggi 2 soniyada 2 ochkolik zarba bilan g'alabani “ilib” ketgani butun musobaqaning eng dramatik lahzasi bo'ldi, deyish mumkin.

Shu tariqa, terma jamoamiz mazkur qit'a birinchiligini 4 ta oltin, 1 ta kumush va 2 ta bronza medallari bilan yakunladi. Ahamiyatli tomoni, erkaklar terma jamoamiz 4 ta oltin medal bilan musobaqa mezbonlarini ortda qoldirib, umumjamoa hisobida birinchi o'rinni egallashdi. Qayd etish joiz, terma jamoamiz qit'a birinchiliklarida shu paytgacha 4 ta oltin medal qo'lga kiritmagan edi.

O'zbekiston Milliy Olimpiya qoʻmitasi taekvondochilarimizning ushbu tarixiy natijasi bilan O'zbekiston taekvondo WT assotsiatsiyasi va jamoamizni, murabbiylar shtabini samimiy qutlaydi.