Neymar “PSJ”dan ketmoqchi, u klub prezidentidan norozi

“Pari Sen-Jermen” klubi hujumchisi Neymar jamoani tark etish haqida jiddiy o'ylamoqda. 30 yoshli braziliyalik futbolchi klub prezidenti Nosir Al-Xelayfidan norozi bo'lgani uchun parijliklar lagerini tark etmoqchi. Bu haqda RMC Sport xabar berdi.

Manbaning qayd etishicha, Neymarga Al-Xelayfiyning matbuotdagi so'nggi bayonotlari yoqmagan. “PSJ” prezidenti Neymarning ketishi mumkinligi haqidagi savolga, istisnosiz barcha futbolchilardan o'tgan mavsumga qaraganda ko'proq fidoyilik kutishini aytgan. Shundan so'ng, braziliyalik hujumchi klub uni qadrlamasligiga ishonch hosil qilgan. U, shuningdek, o'zini jamoa etakchisi sifatida his qilishni xohlaydi.

Avvalroq, “PSJ” yozgi transfer oynasida futbolchilar maoshlarini tushirishni rejalashtirayotgani va bir nechta o'yinchilardan qutulishga tayyorligi haqida xabarlar tarqalgan edi. Bir mavsum uchun taxminan 50 million evro maosh oladigan Neymar ketishga asosiy nomzodlardan biri.

Eslatib o'tish mumkin, 30 yoshli Neymar 2017 yildan beri “PSJ”da o'ynab keladi va “Barselona”dan 222 million evro evaziga xarid qilingan. Bu transfer jahon futbolida sarflangan mablag' bo'yicha rekord ko'rsatkich bo'lib qolmoqda. Neymarning parijliklar bilan shartnomasi 2025 yilgacha mo'ljallangan.

Manba: www.championat.com