«Manchester Siti» etakchisi «Barselona»ga o'tishni xohlamoqda

«Manchester Siti» yarim himoyachisi Bernardu Silva faoliyatini «Barselona»da davom ettirishi mumkin.

Mundo Deportivo’ning xabar qilishicha, portugaliyalik futbolchi bolalik davridan beri katalon klubida to'p surishni orzu qiladi.

O'tgan qishda «Barselona» vakillari Ferran Torres bo'yicha muzokara o'tkazish uchun Manchesterga juda ko'p tashrif buyurgan. Shunday tashriflarning birida futbolchi «Barsa» vakillari bilan uchrashgan va jamoaga o'tish istagini bildirgan.

Avvaliga «Barselona» rahbariyati buni hazilga yo'ygan. Biroq bir necha kun o'tib Silva «ko'k-anorranglilar» vakilidan biriga xabar yuborgan va unda tezroq katalonlar safiga qo'shilish niyatida ekanini aytgan.

Shuningdek, agent Jorje Mendesh ham «Barselona» prezidenti Xoan Laporta va klubning qator rahbarlari bilan bo'lgan uchrashuvda Silvaning bu qiziqishini tasdiqlagan.

Avvalroq «Manchester Siti» Bernardu uchun 85—95 million evro pul so'rashi xabar qilingandi.

Ortda qolgan mavsumda 27 yoshli futbolchi «Manchester Siti» safida 50 ta o'yin o'tkazib, 13 ta gol va ettita golli uzatma muallifiga aylandi.