Davlat Bobonovning «katta dubulg'a»dagi kumush medali uni reyting etakchisiga aylantiradi

Mo'g'ulistonning Ulan-Bator shahrida dzyudo bo'yicha “katta dubulg'a” turkumiga kiruvchi musobaqa o'z yakuniga etmoqda. Biroz avval -90 kg vazn toifasida hamyurtimiz Davlat Bobonov kumush medalni qo'lga kiritdi.

Bobonov finalda rossiyalik Mixail Igolnikovga qarshi tatamiga chiqdi. Qiziqarli kechgan bellashuv 2014 yilgi o'smirlar Olimpiadasi chempioni Igolnikovning g'alabasi bilan yakunlandi.

Shu tariqa, sportchimiz ushbu musobaqa orqali jahon reytingi uchun 700, Parij-2024 yo'lida esa 350 ochkoni qo'lga kiritmoqda. Yana bir ahamiyatli tomoni, mazkur natija sportchimizni kelasi hafta e'lon qilinadigan jahon reytingida ushbu vazn peshqadamga aylantiradi.

Shu tariqa, dzyudochilarimiz Mo'g'uliston zaminida o'tgan nufuzli musobaqani 1 ta oltin, 1 ta kumush va 2 ta bronza medali bilan yakunlashmoqda. O'zbekiston Milliy Olimpiya qo'mitasi O'zbekiston dzyudo federatsiyasi, sportchilarimiz va murabbiylar shtabini mazkur muvaffaqiyat bilan samimiy qutlab qoladi.