UEFA Neymarni 3ta o'yinga diskvalifikatsiya qildi

"Pari Sen-Jermen" klubi Evropa chempionlar ligasining nimchorak final bosqichidan chiqib ketganidan keyin parijliklar hujumchisi Neymar o'zining Instagramdagi sahifasi orqali hakam Damir Skominani haqorat qilgandi.

Sloveniyalik hakam o'yin so'ngida to'p Kimpembening qo'liga tekkani bois "PSJ" darvozasiga penalti belgilagandi. Reshford esa 11 metrli jarima zarbasini aniq amalga oshirdi va "PSJ" musobaqani tark etdi.

"Bu sharmandalik! Videotakrorni kuzatish uchun futbolni tushunmaydigan 4 odamni qo'yishgan. Hech narsa bo'lmagan edi. Futbolchi bunday paytda qanday qilib qo'lini olib qochishi mumkin edi?", — deya yozgan edi Neymar.

UEFA esa bu ishni ko'rib chiqib, braziliyalik futbolchini evrokuboklarning 3ta o'yiniga diskvalifikatsiya qilish haqida qaror chiqardi.

Shu tariqa, Neymar EChLning kelasi mavsumidagi guruh bosqichining dastlabki 3ta o'yinida maydonga tusha olmaydi.