Dzyudo. Ulan-Batordagi «katta dubulg'a»da 2ta bronza medali qo'lga kiritildi

Ulan-Bator shahri mezbonlik qilayotgan dzyudo bo'yicha “katta dubulg'a” musobaqasida ikkinchi kun bellashuvlari o'z yakuniga etmoqda. Ushbu kun dasturida 2 nafar vakilimiz shohsupaga ko'tarilishdi.

Ma'lum qilganimizdek, -73 kg vazn toifasida bronza medali uchun kechgan juftliklardan birida Obidxon No'monov hamda Shahram Ahadov to'qnash kelishdi. Qo'shimcha daqiqagacha cho'zilgan bellashuvda Ahadovning 3 ta ogohlantirish olishi Obidxonga bronza medalini taqdim qildi.

Shuningdek, ikki Olimpiya o'yinlarida qatnashgan Gulnoza Matniyazova uchinchi o'rin uchun kechgan bellashuvda qozog'istonlik Zere Bekteskizidan ustun kelib, “katta dubulg'a” turnirlaridagi medallari sonini 3 taga etkazib oldi.

Qayd etish joiz, o'z g'alabalari orqali No'monov hamda Matniyazova Parij-2024 Olimpiya o'yinlari uchun o'z hisoblariga 500 reyting ochkosini yozib qo'yishdi.

Manba: olympic.uz