Ulug'bek Baqoev: «Futbolchilar hozir jismoniy va ruhiy jihatdan yaxshi formada»

"So'g'diyona" bugun OFK kubogidagi yurishini boshlaydi. Guruh bosqichining ilk turida jizzaxliklarga Qirg'izistonning "Neftchi" klubi raqiblik qiladi. Kecha har ikki klub bosh murabbiylari ishtirokida matbuot anjumani o'tkazildi. Dastlab Ulug'bek Baqoev o'z fikrlari bilan o'rtoqlashdi.

"Ushbu musobaqaga yaxshi tayyorgarlik ko'rib, har bir o'yin uchun reja ishlab chiqdik. O'zbekiston sharafini himoya qilayotganimiz uchun muxlislarimizni quvontirishga harakat qilamiz. Biz barcha klublarni hurmat qilamiz. Har bir o'yin qiyin kechishini bilamiz. Chunki har bir murabbiyning o'z o'yin uslubi bor.

Musobaqada imkon qadar uzoqroqqa borishga intilamiz. Ammo hamma narsa futbolchilarning qanday o'ynashiga va qanday natija qayd etishimizga bog'liq.

Ayni paytda yaxshi o'yin ritmiga ega bo'lganimiz bizga OFK kubogida ham yordam berishi kerak. Hozirda jismoniy va ruhiy holatimiz juda yaxshi holatdamiz.

Ichki musobaqada xato qilsak, keyingi o'yinda xatoni to'g'irlash mumkin. Ammo OFK kubogida bunday imkoniyat bo'lmaydi. Ammo hozirda futbolchilarim yaxshi formada ekaniga ishonaman", — dedi Baqoev.

Eslatib o'tamiz, "So'g'diyona" - "Neftchi" o'yini Toshkent vaqti bilan 19:00da boshlanadi.