Sampaoli "Marsel" rahbariyatini iste'foga chiqish bilan qo'rqitmoqda

Argentinalik mutaxassis Xorxe Sampaoli "Marsel" klubi rahbariyatining transfer bozoridagi harakatlaridan norozi. Klub rahbariyati tarkibni kuchaytirish uchun qat'iy qadamlar tashlamasa, murabbiy klubni tark etishi mumkin.

Todofichajes nashrining xabariga ko'ra, murabbiy yangi o'yinchilarni ololmasa, shu oy oxirigacha iste'foga chiqadi. Avvalroq OAV "Marsel"ning chililik hujumchi Aleksis Sanches va bosniyalik yarim himoyachi Miralem Pyanichga qiziqishi haqida xabar bergan edi.

62 yoshli murabbiyning "Marsel" bilan amaldagi shartnomasi 2023 yilning o'rtalariga qadar mo'ljallangan. Uning qo'l ostida provansliklar o'tgan mavsumda Frantsiya vitse-chempioniga aylanishdi.