Tokioga veloshosse yo'li Toshkentdan boshlanadi

Bugun Toshkent yana bir nufuzli musobaqaga mezbonlik qilishni boshladi. Qit'amizning eng kuchli veloshosse ustalari 28 aprelga qadar kechadigan bahslarda o'zlarining bor iqtidorlarini namoyish etish uchun yurtimizga tashrif buyurishdi.

Qolaversa, ushbu Osiyo chempionati mazkur sportning Olimpiya o'yinlari dasturiga kiritilgan yo'nalishlarida Olimpiya yo'llanmalarini taqdim etishi bilan yanada ahamiyatli. Shu bois ham unda «sariq qit'a»ning 40 ga yaqin mamlakatidan 500 ga yaqin eng sara sportchilar jam bo'lishdi.

Bugun musobaqaning birinchi kun dasturlari o'tkazildi. Unda ko'pchilikning diqqat-e'tibori erkaklar va ayollar o'rtasidagi jamoaviy sprint poygasiga qaratildi. Poygalarda erkaklar o'rtasida Qozog'iston, ayollar o'rtasida esa Janubiy Koreya terma jamoasining qo'li baland keldi. Ushbu dasturda hamyurtlarimiz ham ishtirok etib, sakkizinchi va beshinchi natijani qayd etishdi. Shuningdek, kunning ikkinchi yarmida parasportchilar bo'yicha ham kator klassifikatsiyalar bo'yicha g'olib va sovrindorlar aniqlab olindi.

Mazkur bellashuvlarga Bo'stonliq tumani mezbonlik qilmoqda. Ochiq tabiat va toza havo qo'ynida kechayotgan poygalar ko'plab muxlislarga manzur bo'lmoqda. Ta'kidlash joiz, jamoamiz vakillarining etakchilikdagi chiqishlari hali oldinda. Ertaga 20 va 23 yoshgacha bo'lgan toifada yakkalik bellashuvlari bo'lib o'tadi.