EChL. Anons. Bugun hayot-mamot janglari bo'ladi

11-dekabr, seshanba kuni Evropa Chempionlar Ligasining 4 ta guruhida 6-tur o'yinlari bo'lib o'tadi.

«A» guruhida deyarli barcha masala hal bo'lgan. Ikki yo'llanma egasi aniq — «Atletiko Madrid» va «Borussiya D». Evropa Ligasiga esa «Bryugge» yo'l olgan. Bugungi o'yinlar esa faqatgina guruh g'olibi nomiga aniqlik kiritib berishi mumkin.

«B» guruhida 1-o'rin masalasini «Barselona» 13 ochko bilan muddatidan avval hal etgan. Kataloniyaliklar bugun 7 ochkosi bor «Tottenhem»ni qabul qiladi. «Shporlar» keyingi bosqichga chiqishi uchun g'alaba qozonishi talab etiladi. Boisi 7 ochkoga ega «Inter» o'z maydonida guruh autsayderi PSVni mehmon qiladi.

«C» guruhida bugun barcha yo'llanmalar o'z egasini topadi. Ayni damda 6 ochkoga ega bo'lib turgan «Liverpul» 9 ochko bilan guruhda peshqadamlik qilayotgan «Napoli» bilan kuch sinashadi. Mazkur o'yinda Klopp shogirdlarini faqat g'alaba qanoatlantiradi. Anchelotti shogirdlariga esa durang ham kifoya qiladi. 8 ochko bilan guruhda ikkinnchi o'rinni band etib turgan PSJ safarda «Srvena Zvezda» mehmoni bo'ladi. PSJning taqdiri ham o'z qo'lida, agar Tuxel shogirdlari safarda g'alaba qozonsa hech qanday to'siqsiz pley-offga chiqadi.

«D» guruhidagi o'yinlar bir vaqtda — 22:55 da bo'lib o'tadi. Mazkur guruhda «Portu» birinchi o'rin masalasini, «Shalke-04» esa ikkinchi o'rinni hal etgan. «Portu» safarda «Galatasaroy» mehmoni bo'ladi. Mezbonlar Evropa Ligasiga yo'l olish uchun guruh peshqadamini yutishga harakat qilib ko'radi. Xuddi shu ishni «Lokomotiv» safarda «Shalke-04»ga qarshi o'yinda takrorlashga harakat qilib ko'radi.